تجمع المهنيين السودانيين : اتفاق البرهان حمدوك وصاية من المجلس العسكري ويتخوف من انقلاب جديد

79

الخرطوم “تاق برس ” – اصدر تجمع المهنيين السودانيين بيانا بشأن اتفاق رئيس الوزراء عبد الله حمدوك ورئيس مجلس السيادة عبد الفتاح البرهان قال فيه ان اتفاق البرهان وحمدوك قبول بوصاية المجلس العسكري واعتبر ذلك انتكاسة خطيرة.

واضاف البيان ” يمكن ان ياتي المجلس العسكري في اي وقت لاحق ويقرر ان العملية السياسية لا تسير في وضع صحيح وينفذ انقلابا جددياً مرة اخرى.

ينشر تاق برس نص بيان تجمع المهنيين السودانيين

اتفاق البرهان حمدوك بيعني القبول بأنو المجلس العسكري وصي على العملية السياسية ودي انتكاسة خطيرة، وممكن في أي وقت لاحق تاني يقرروا أنو العملية السياسية ما ماشة كويس وينقلبوا عليها.

– دا ما معناه العملية السياسية قبل 25 أكتوبر كويسة أو عايزين نرجع ليها، لأنو في ناس دي مشكلتها مع الاتفاق بتاع الحمدوك برهان، أنو ما رجعهم لما قبل الانقلاب، بينما البنقولوا أنو إصلاح العملية السياسية يتم سلميا وبأدوات الشارع عبر إسقاط أو تغيير الحكومات، وليس عبر الانقلاب العسكري.
– هدفنا المباشر الآن هو إنهاء وصاية العسكر على العمل السياسي عبر المقاومة السلمية، لأنو لو ما حققنا دا تاني في نهاية الفترة الانتقالية أو قبلها حينقلب المجلس العسكري لنفس الأسباب، اللهي خوفهم من انتقال السلطة لحكومة مدنية منتخبة قادرة تحاسبهم على الفات.
– إذن البوصلة هنا ما موقف حمدوك، البوصلة هي غايات الشارع في المدنية والعدالة والحرية والسلام، إعادة تجربة أنو تكون عندنا سلطة انتقالية تحت سيطرة ورحمة المجلس العسكري اللي يوم أمس بيقتل فينا يعني أننا ما حنحقق فيهن شي، بل حتزداد قوة المجلس العسكري بالاتفاق دا، وحيستمر انفرادو بالملف الأمني وحتستمر شركاتهم خارج ولاية الحكومة المدنية ويستمر النهب والتهريب لمقدرات البلد لمصلحة المجموعة الصغيرة دي، وحتبقى إزالتهم أصعب كلما أحكموا سيطرتهم أكتر.
– مقاومتنا دي عشان تتوسع وتستمر لابد نبنيها من تحت وفي بالنا شعار #الثورة_نقابة_ولجنة_حي، ننخرط كلنا في تكوين أجسام نقابية ثورية في محل شغلنا أو مع زملاننا في مجال العمل إذا لسة ما اتكونت، تشتغل الأجسام دي في أدوات المقاومة السلمية (زي العصيان والإضراب والوقفات) وتكون خطوات في بناء النقابات الشرعية، زيما بنشتغل في لجنة المقاومة في الحي بي أدوات التتريس والمواكب، لأنو دا التكامل المطلوب في وسائل مقاومتنا السلمية البيخليها تكون فعالة ومتينة، وغير قابلة للاختراق.
إعلام التجمع
23 نوفمبر 2021
تجمع المهنيين السودانيين : اتفاق البرهان حمدوك وصاية من المجلس العسكري ويتخوف من انقلاب جديد
whatsapp
أخبار ذات صلة