عبد الماجد عبد الحميد يكتب معلقا على صورة لرئيس الوزراء والردود الساخرة تتوالى
من الأول قلنا دي حكومة زي غطا التنك، لو ضاع عاااادي كيس نايلو بيجي محلّو“.
متابعات – تاق برس- أثارت صورة لرئيس الوزراء كامل إدريس بمعية مسؤولين سعوديين خلال زيارته إلى السعودية، جدلاً واسعاً بين الكُتّاب والناشطين. دفعت بالكاتب الصحفي عبد الماجد عبد الحميد تناول الموضوع بطريقته الساخرة المعهودة، قبل أن تتوالى ردود وتعليقات السودانيين ساخرة على المشهد.
حيث كتب عبد الماجد قائلا:
من طرائف مجالس الأُنس والسّمر مع أستاذ الأجيال حسين خوجلي أن شيخاً من أصحاب الأموال والأملاك لاحظ ولمدة شهر أن مدير أعماله ومصانعه بمدينة بورتسودان ظلّ ضيفاً راتباً وحاضراً لكل مناسبات الخرطوم الاجتماعية التي يحضرها الشيخ ورجل الأعمال التاريخي..
وذات جلسة من جلسات تلك المدة نادي الشيخ علي مدير مصانعه بمدينة بورتسودان : يازول .. السلام عليكم ورحمة الله وبركاته .. إنت مش يا كا زولنا بتاع مصانعنا في بورتسودان؟! .. أجاب المدير مبتسماً : نعم ياشيخ .. وطيب إنت ليك شهر هنا والشغل هناك ماشي عادي .. أجاب المدير : نعم .. عندك إجازة ولا جيت ساي .. أفاد المدير بأن إجازته إنتهت منذ شهر ودة الشهر التاني.. سأله الشيخ : قاعد في الخرطوم شهر بعد الإجازة والشغل في بورتسودان ماشي عادي؟ .. أجاب المدير : نعم ..
نقل لنا الأستاذ حسين خوجلي ختام هذه القصة القصيرة بأن الشيخ نادي المدير العام لأعماله وقال له بصرامة : أرفد الزول بتاع بورتسودان دة طوالي.. مادام المصانع هناك شغالة شهر كامل في غيابو مافي داعي ليهو!!
عزيزي محمد حامد جمعة نوار : هل ستتوقف عجلة الإنتاج في السودان عن الدوران أو ستخرج بورتسودان في مظاهرة صاخبة للمطالبة بعودة الدكتور كامل إدريس وأعضاء مكتبه والحفيان هذا إن قدّم رئيس وزرائنا اعتذاراً عن مباشرة مهامه في السودان وغادر إلي جنيف أو لندن بعد ختام زيارته الحالية إلى السعودية ؟!
آمل أن تكون إجابتك مباشرة يا جمعة وبلاش حركات رواد دار الرياضة أم درمان !!
● ملحوظة ( الصورة لها علاقة مباشرة بالموضوع!!)
ووجدت المادة ردود فعل واسعة حيث حصدت 35 مشاركة وعشرات التعليقات وأكثر من 1300 لايك. وجاءت التعليقات باللهجة الدارجة السودانية على النحو الآتي:
مبارك مصطفى قال “الإجابة عند غالب أهل السودان، حتى لو غاب كامل ستة شهور تانية ما في زول حيحس بيهو.. والأحسن ياخد معاه الحفيان والعريان كمان، عشان ما عارفين بعملوا شنو”.
اما خالد عبد الكريم فقال “من الأول قلنا دي حكومة زي غطا التنك، لو ضاع عاااادي كيس نايلو بيجي محلّو”.
وقال عبد الله علي الحاج: “طالما الأمور ماشة.. أرفدو طوالي قبل ما يطلب لجوء سياسي”.
بينما قال محمد زين: “نصحناهم، السلطة دي حلوة لكن الزمن دا ما مناسب.. السيادة ناقصة، العملة ورق ساكت، الصحة والتعليم في الحضيض.. والأحسن كل زول يشيل شنيطتو ويرجع بلدُو بدل ما يكون شريك في الجريمة”.
وعلق طارق علي: “يا جماعة في رئيس وزراء بمشي الغرفة التجارية السعودية؟ دي شغلة رجال أعمال.. الحاصل دا هملة وفضيحة ساكت”.
عثمان علي قال: “بلد هملة.. الحفيان دا شنو بالله؟ زول بيقرر وبيحل وبيربط وما عندو أي صفة! نحن محتاجين حكم مدني وانتخابات نزيهة، غير كدا ما في حل”.
بينما قال أحدهم أن المملكة لم تحترم كامل إدريس حين أرسلت لاستقباله في المطار نائب أمير منطقة.. يساوي عندنا نائب الوالي، فهل سيرضى محمد بن سلمان باعتباره رئيس وزراء ان يستقبله مثلا نائب والي ولاية سنار- مثلا-
أيضا حظيت الصورة بتعليق من الكاتب الصحفي حسين ملاسي والذي قال:
أب شعر يمين الصورة الذي يبدو كمن يصفق هو الحفيان، والذي يبدو كالمستاء شمال الصورة هو السفير دفع الله الحاج الذي كلف/رشح لوزارة الخارجية ثم انتهت حظوظه بوصول كامل والحفيان..!
وحظي الآخر هو أيضا بكمية من الاعجابات والمشاركات والتعليقات حيث علق أحدهم على نظرة السفير دفع الله الحاج في الصورة بأنه (ماخد وضعية من أين أتى هولاء)..
وعلق أحدهم متهكما على الحفيان قائلا: (رئيس رئيس الوزراء)..
